सुर्खेत उद्योग वाणिज्य संघको स्थापना वि.सं. २०३८ सालमा भएको हो। तत्कालीन मध्यपश्चिम क्षेत्रको राजधानी वीरेन्द्रनगर, सुर्खेतमा अवस्थित यो संघ समग्र निजी क्षेत्रको प्रतिनिधित्व गर्ने प्रमुख संस्थाका रूपमा स्थापित भएको थियो। यो संघ एक गैरनाफामूलक संस्था हो, जसले निजी क्षेत्रको समग्र विकासमा निरन्तर योगदान पुर्‍याउँदै आएको छ।

स्थापनाकालदेखि नै संघले यस क्षेत्रको कृषि, उद्योग, व्यापार तथा सेवा क्षेत्रको विकास र प्रवर्द्धनमा महत्वपूर्ण भूमिका निर्वाह गर्दै आएको छ। उद्योगी तथा व्यवसायीहरूको हकहित संरक्षण, नीति निर्माणमा सहकार्य तथा समन्वय, साथै आर्थिक गतिविधिहरूको विस्तारमा संघ सक्रिय रूपमा संलग्न रहँदै आएको छ।

सुर्खेत उद्योग वाणिज्य संघ पश्चिम नेपालको एकमात्र ISO Certified संस्थाका रूपमा परिचित छ। हाल संघमा करिब ७,३०० व्यवसायीहरू आबद्ध रहेका छन् भने झण्डै २१ वटा वस्तुगत समितिहरू क्रियाशील रहेका छन्।

संघ कर्णाली प्रदेशको राजधानी वीरेन्द्रनगरमा अवस्थित रही स्थानीय सरकार, प्रदेश सरकार तथा संघीय सरकारसँग समन्वय गर्दै व्यवसायिक रणनीति निर्माणमा सक्रिय भूमिका निर्वाह गरिरहेको छ। साथै, राज्य र निजी क्षेत्रबीच सुदृढ पुलका रूपमा कार्य गर्दै समग्र आर्थिक विकासमा योगदान पुर्‍याइरहेको छ।

संघले व्यवसायिक हकहितको संरक्षण तथा प्रवर्द्धनका लागि देशभर नै अग्रणी भूमिका निर्वाह गर्दै आफूलाई एक सशक्त तथा विश्वासिलो संस्थाका रूपमा स्थापित गर्न सफल भएको छ।